Der Rock, es Markezeiche vo dir, glich wie
z Huutlümpi wo d Stirn vo dim Chopf ziert.
E dankbare Blick, gugget i mini Richtig, wo d Tür vor mir ufgiit.
Uf d Frag wies dir giit? chunnt es gwohnts "Es giit gwüss gäbig, danke".
Was für es Privileg dases isch, dig i üsem Läbe z ha, unbeschriebbar.
Ja so viel Erinnerige, verbinde mi mit däre Wohnig, wo Du Husisch drin.
I wiss ned wie viel Stunde mir als Chind bi dir hi verbrunge.
Dier isch allpot öppis kreativs i Sinn cho,
-für z bastle u ds hägle.
Als sache woni dran hange, bis hüt.
Du hesch üs so viel glehrt zum bispiel Dankbar z sii.
Du bisch der nie z Schad gsi o dass vergisseni ned.
Di Optimismus u dini Sicht uf ds Läbe, het nu menge vo üs junge inspiriert.
U jede wo die kennt, würdi dini unglublig Grosszügigi Art nenne, wes drum gengi ufzzelle oder öpperem z erkläre wär Du bisch.
Ä wahrlig eifache aber bodestendige, dienende u liebenswerte Läbensstil.
Z schönschte Gschenk isch dis Lache u dis da Sii.
Danke bisch du ging für mi, ja für üs aller ä stützi gsi.
I denke grad hie viel a dii, us guetem Grund.
I mim Ohr ertönt grad es Lied, wo drin vorchunnt, dass me däne Mensche söll danke bevors z spat isch.
U i wiss dass du würdisch druf antworte "das isch doch ki sach" oder "sälbstverstendlich", i kenne dii.
Aber das isches ned.
Ds Läbe isch mengisch eifach zügig.
Ahalte cha das niemer vo üs, ned Ziit u ned z Alter, es schrittet ifach vorah.
Du bisch e riese bericherig für üser aller Läbe, i wagti z säge wie es witers Grossmuetti.
Danke für dini Geduld dis Lache u diner ufmunternde Wort, "vergälts dir Gott".
Du hesch e ganz höiie stellwert i mim Härz.
Danke für all die lehrriche Stundi.
Du bisch mir wichtig u drum wetti dir das säge bevors z spat isch, will üs beidne het d Vergangehiit ziigt, dass ds Läbe so kostbar wies o ma sii, tiifig cha z End gah.
I bi i gedanke bi dir u i bätte, das Gott grad i däm Moment wo diner Uuge die Zilli läse, s dir leht la warm um z Härz wärde.
Das isch e Art Homage, a dii
Es chliis merci o weni wiis dass dus chum a die "Grossi Glogge" würdisch heche.
Aber i maches glich, will i mir ned wod ds Schad sii, dir z ziige wie Dankbar ii bii, für di.

- Diego Bircher