Lyrikgalerie

Tick, Tack, tickt d'Uhr ab.

Klick, Klack stilli macht sich breit, 

Chilcheglogge erschlöh der Ton vor Musig.

Es stuune, paar glizrigi Ouge luege gspannt.

Ds Knarze vor Tür verheisst, Sie si da.

Es paar cremewiss u schwarzi Schueh schlendere dür dä Gang.

Klick machts, Fokus passt, 

d'Lüüt stöh uf zwüsch de Chilchebänk. 

Paar Schritte u Freudeträne speter übergibt der Vatter sini Tochter em Maa vorem Altar.

D'Familiefiir isch im gang, der Hans mitem Loufstock sitzt im hindere Egge ab.

Der ganz Ruum voll vo Mensche,

wo dür ihn u sini Dame si entstande.

Ä gstandne Maa het müesse gah, 

d'Tochter söll ne chönne i Erinnerig bhalte, 

Sie isch zweni alt für's ds tschegge,

was passiert da.

Die leschte Bilder söllene Ehre, am Grab.

Ir Chilche louft ä Diashow 

über sini Erläbniss ab.

Für was ii das mache? 

Ds läbe gärn ds ha. 

Momänte iizfah wo ner bis id 

Endlichkeit dörfe ar Wand hange. 

Es blibt als einzigs zrügg, 

d'Chleidig isch zu oft overdressd,

d'Blueme chasch tröchne, 

ds Ässe liecht verdoue u der Wyy setzt sich maximal im Chäller fescht.

Aber Fotografie blibt, sii isch Ziitlos, 

passt id iirichtig vo zimli jedem Wohnzimmer u süsch z'minscht i ds Härz.

Sie erweicht, drückt us 

u füehlt sich Einzigartig ah, 

ä Erinnerig a Momänte mit de liebste.

Es leschts Foto vom Grossvater

wo er lächlet, bevor er het müesse gah.

Das isch werum igs mache, um chönne Momänte fescht z'halte wo nie meh so 

wärde wiederkehre. 

Die Emotione chame nid wiederhärstelle, jedi Situation isch vergänglich, 

jedoch chönne mirs abbilde, 

uf Bilder festhalte, es lächle u paar Träne vergiesse we üs d'Fotos dür d'Händ gleite.

Fotos zeige das mir nid so machtlos si gäg  d'Endlichkeit, wie mirs so oft z'gfüehl hei.

Für das bini da, 

darum übernimmi gärn de Part 

um teil z'ha u ds Erinnere drah.

Egal öbs schiffet a Egerle, 

s'chuttet dür Saane oder d'Sunne blendet zwüsch de Räbe ir Spiezerbucht, 

i bi da u haltes fescht, für dii.

Schetze das isch d'Ehr Fotograf z'sii.

Es isch mini Gab, mis danke a Gott u d'Wält, ab und zue chli Schönheit chönne z'tanke.

- gschribes by Diego Bircher